Son Antonia Céspedes, son xerente de Imaxinatea e a miña experiencia forxouse a través da práctica teatral. Nestes primeiros Post, profundaremos na importancia da práctica e formación teatral en todas as etapas da vida:
“A través do teatro podemos ver reflectida a vida, as paixóns, os destinos humanos, os aconteceres dunha época e os costumes das diferentes civilizacións”
O Teatro é unha ferramenta válida na formación da conciencia das persoas e dos pobos. Para iso, na nenez e na adolescencia, etapa na que o ser humano crea a súa base para o futuro, as clases de teatro ofrecen recursos moi valiosos e descoñecidos e na etapa adulta axuda a redescubrirse a si mesmo
Na miña experiencia persoal como animadora teatral no ámbito do ensino teatral non formal, puiden observar como a práctica teatral, ten a capacidade de transformar ás persoas, sen importar a idade.
Ao longo destes anos nas miñas clases de teatro, comprobei como alumnos e alumnas provenientes de diferentes profesións, niveis culturais e niveis socio-económicos, atopaban no teatro unha nova perspectiva de vida, outras vías de comunicación descoñecidas ata ese momento. Observamos, como nalgúns casos, a práctica teatral chegou a transformar as súas vidas por completo.
“O teatro constitúe dende o inicio dos tempos un espazo máxico no que é posible o encontro, a expresión e a comunicación, pois permite crear unha especie de espazo transicional, onde todo se pode dar, mesmo a aprendizaxe e a terapia. O teatro constitúe un instrumento educativo cunhas potencialidades aínda por explorar, e múltiples informes fundamentan e avalan a súa necesidade; as moi variadas experiencias desenvolvidas en diversos países mostran que tanto a asistencia a espectáculos teatrais como a propia práctica do teatro promoven aprendizaxes que ningunha outra área pode suscitar” (Vieites, 1997).
